Heidi Hjorteland Wigestrand

Eg er oppkalla etter ei jente i ei barnebok frå Sveits, og vaks som henne opp relativt høgt til fjells. Heilt frå eg var liten visste eg at eg skulle bli journalist.

Utdanninga mi tok eg ved dåverande DH, Distriktshøgskolen i Stvavanger. Først eit år på engelsk grunnfag frå 1988 til 1989. Deretter eit toårig journaliststudium frå 1989 til 1991.

I 1992 fekk eg jobb i Stavanger Aftenblad, ved avisas lokalkontor i indre Ryfylke. Her blei eg verande til eg i 2013 i samband med nedbemanningsprosessar i avisa, tok sluttpakke.

I mitt virke som journalist på eit einmannskontor har eg lært meg å jobba veldig sjølvstendig. Eg meiner sjølv at eg er som poteta, og kan dekka dei fleste fagfelt. Som åleinegåande reportar har eg i løpet av mine år i Aftenbladet dekka både drapssaker, andre ulukker, næringsliv og politikk, for å nemna noko.

Dei nære sakene der ein går tett inn på kvardagsmennske likar eg best. 
Eg turnerer dei fleste journalistiske sjangrar rimeleg bra, og har også skrive ein del kommentarar i Stavanger Aftenblad i tidlegare år
.
Som skrivande menneske hadde eg også ein draum om å skriva bøker. Til nå har det blitt to.
Den første boka, ei novellesamling kalla "Vranglås" kom i 2005. Den andre boka som er ein roman som heiter "Utstøytt" kom i 2009.

I 2014 vann eg ein krimnovellekonkurranse i regi av Liv Forlag, og kom på trykk i novellesamlinga "Døden på Slottsfjellet.".

Eg har stor arbeidskapasitet, og arbeider raskt. Etter ein svangerskapspermisjon er eg så smått i gong med mitt frilansliv. Til denne tid er det vekebladet Hjemmet og eit magasin kalla Mitt Ryfylke som har vore dei største oppdragsgivarane, men eg har også tatt enkelte oppdrag for Suldalsposten og Stavanger Aftenblad. Norsk Ukeblad og Familien har eg også vore innom.